Rıdderde úıler qaıta sýyp ketti

ÓSKEMEN. QazAqparat – Shyǵys Qazaqstan oblysy Rıdder qalasynda úıler qaıta sýytyp ketti, dep habarlaıdy QazAqparat tilshisi.

1 jeltoqsan kúni Rıdder turǵyndary páterlerinde jylýdyń qaıta azaıyp ketkendigine shaǵymdanǵan. Tótenshe jaǵdaı jónindegi jedel shtab ókilderi munyń sebebin túsindirdi.

«Jylý elektr ortalyǵy sýdy Gromotýha ózeninen alady. Ózendegi «Lenınogorsk» SES ýchaskesinde qabyrshaq muz jınalýyna baılanysty osyndaı jaǵdaı bolyp otyr. Rıdder turǵyndary bul tabıǵı qubylysty burynnan jaqsy biledi. Ózendi tazartý boıynsha barlyq qajetti jumystardy SES qyzmetkerleri júrgizip jatyr. Jaǵdaı turaqtanyp keledi», - delingen aqparatta.

Qazir ortalyqtaǵy № 2,3 jáne 6-shy – úsh qazandyq jumys istep tur. Júıede temperatýra 60 gradýsqa deıin kóterildi. Tórtinshi joǵary qysymdy qazandyqta barlyq tehnıkalyq jumystar júrgizildi, ol qosylýǵa daıyn.

«Jurtshylyqtan túsinistik tanytyp, sabyr saqtaýdy suraımyz. Mamandar JEO-da táýlik boıy jumys istep jatyr. Olar jylý elektr ortalyǵynyń agregattaryn qalypqa keltirý úshin barlyǵyn jasaýda», - delingen habarlamada.

Eske salsaq, 5 qarasha kúni saǵat 20.00-de Rıdderdegi JEO-da kúl shyǵarý júıesindegi sorǵy isten shyǵyp, №1 qazandyq agregatynyń qosalqy jabdyǵy apatty jaǵdaıda ajyratylǵan bolatyn. Sonyń saldarynan 22 myńnan astam abonent úshin jylý berý azaıtyldy.

Tótenshe jaǵdaıǵa baılanysty qaladaǵy mektep oqýshylary 11 qarashaǵa deıin qashyqtan oqydy.

10 qarasha kúni Rıdderdegi jylý elektr ortalyǵynda taǵy da apat boldy.

14 qarashada jylý elektr ortalyǵyn qalpyna keltirý jumystary kestege saı júrip jatqany habarlandy.

Sondaı-aq jylý ortalyǵyndaǵy qazandyqtardy jóndeýge reseılik mamandar tartylǵan bolatyn.