Rıdderde tútin tumshalaǵan podezden 20 adam evakýatsııalandy
ÓSKEMEN. QazAqparat – Shyǵys Qazaqstan oblysy Rıdder qalasynda tútin tumshalaǵan podezden 20 adam, onyń ishinde 5 bala evakýatsııalandy, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, kópqabatty turǵyn úıdiń birinshi qabatynda ornalasqan páter ıesi peshke tamaq qoıyp, umytyp ketken. Osynyń saldarynan tútin búkil podez ishine tarady.
«Oqıǵa ornyna dereý jetken qutqarýshylar qaýipsizdik maqsatynda 20 adamdy evakýatsııalady. Onyń ishinde 5 bala bar. Sodan soń páter tútinnen tazartyldy. Zardap shekken eshkim joq», - dep habarlady vedomstvo ókilderi.
Osy rette departament mamandary óńir jurtshylyǵyna peshti paıdalanǵan kezde barynsha muqııat bolý kerektigin eskertedi.
