Rıdderde tótenshe jaǵdaı rejımi áli saqtalýda

ÓSKEMEN. QazAqparat – Shyǵys Qazaqstan oblysy Rıdder qalasynda tótenshe jaǵdaı rejımi áli saqtalýda, dep habarlaıdy QazAqparat tilshisi.

3 mamyr kúni Rıdderde jylytý maýsymy aıaqtalǵan bolatyn. Alaıda áli de qalada tótenshe jaǵdaı rejımi saqtalyp otyr. Bul týraly qala ákimdiginen málim etti.

Rıdderde jylý jelileriniń 89 paıyzy tozǵan. Jaz boıy jylý jelilerine jóndeý jumystaryn júrgizý josparlanǵan.

«Tótenshe jaǵdaı rejımi «Rıdder JEO» AQ ıesiniń ortalyqty basqarýǵa qabiletsizdigin kórsetkendikten engizildi. Sebebi osy arqyly ákimdik protseske aralasyp, baqylaý júrgize alady. Sondyqtan búgingi tańda tótenshe jaǵdaı rejımi alynbady. Al ystyq sý qala boıynsha 10 mamyrda óshiriledi», - deıdi qala ákiminiń mindetin atqarýshy Darhan Qosantaev.