Rıdderde tizgindi basqara almaı aýdarylyp túsken mototsıkl júrgizýshisi mert boldy

ÓSKEMEN. QazAqparat – Shyǵys Qazaqstan oblysy Rıdder qalasynda tizgindi basqara almaı aýdarylyp túsken mototsıkl júrgizýshisi mert boldy, dep habarlaıdy QazAqparat tilshisi.

ShQO polıtsııa departamenti baspasóz qyzmetiniń málimetine súıensek, oqıǵa 18 maýsymda Rıdder qalasyndaǵy kóshelerdiń birinde bolǵan.

«Yamaha V-max» markaly mototsıkl júrgizýshisi tizgindi basqara almaı qalyp, mototsıkl aýdarylyp tústi. Jol-kólik oqıǵasy saldarynan júrgizýshi sol jerde kóz jumdy. Al jolaýshy túrli dene jaraqattarymen aýrýhanaǵa jatqyzylǵan», - delingen aqparatta.

Jyl basynan beri oblys aýmaǵynda jol apattarynan 21 adam qaza bolyp, 233 adam túrli jaraqat alǵan.

Osy rette, polıtseıler kólik aıdaıtyn óńir jurtshylyǵyna jyldamdyqty ruqsat etilgen shekten asyrmaýdy, kólikter arasyndaǵy qaýipsiz qashyqtyqty saqtaýdy suraıdy.