Rıdderde tabıǵattyń tosyn minezinen keıin halyq birneshe kún boıy sýsyz qaldy
ÓSKEMEN. KAZINFORM – Rıdderde kún raıynyń kúrt sýytyp, qalyń qardyń jaýýyna baılanysty kommýnaldyq qyzmetterdiń jumysynan aqaý shyqty.
Kenshiler qalasynda 3 kún boıy qar tolassyz jaýyp tur. Sondyqtan jaýapty qyzmetter kóshelerdegi qardy tazalap úlgermeı jatyr. Bul avtobýstardyń da qozǵalysyna kedergi keltirdi. Biraq aýa raıynyń tosyn minezi basqalarmen salystyrǵanda sýmen qamtamasyz etý júıesiniń jumysyna edáýir qıyndyq keldirdi.
«Qar jaýyp, kún sýytqan alǵashqy kúni qubyr jarylǵan. Talovka men Polıarnoe shaǵyn aýdandarynda turatyn myńǵa jýyq adam sýsyz qaldy. Bir táýlik ishinde qubyr qalpyna kelgenimen qalaǵa quıatyn Gromotýha ózeninde muz qatyp, sý arnasy men «Kaztsınk» kásipornynyń qubyrlary biteldi», - deıdi turǵyn úı-kommýnaldyq sharýashylyq, jolaýshylar kóligi jáne avtomobıl joldary bóliminiń basshysy Raýan Qurmetuly.
Sonyń saldarynan 60 myń turǵyny bar qala eki kún boıy sýǵa jarymaı otyrdy. Tipti ózennen jer asty sýyna kóshý de nátıje bermedi. Sebebi kópqabatty úılerde qysym jetkiliksiz bolyp, tek tómengi qabattarda sý tam-tumdap aqty.
Al 2 myńǵa jýyq jer úıde turatyn halyq múlde sýsyz qalǵan.
«Osylaısha, qaladaǵy qudyqtarda uzyn-sonar kezek qalyptasty. «Vodokanal» kásiporny jurtqa sý tasyp ákele bastady. Biraq qalyń qardan kólikter barlyq jerge jete almaıdy. Únemi osylaı zardap shegemiz. Bizde nege aldyn ala daıyndalmaıdy?! Bul másele jyl saıyn qaıtalanyp kele jatyr», - dep qala turǵyny Sergeı Kovalev óz narazylyǵyn bildirdi.
Tolassyz jaýǵan qar ózen betin qabyrshaq muz bolyp japqan. Sonyń saldarynan rıdderlikter men osyndaǵy taý-ken baıytý kombınatyna sý qoljetimsiz bolyp qaldy. Kásiporyn óziniń rezervte saqtap otyrǵan sýyn paıdalansa, turǵyndardyń amaly quryp, japa-tarmaǵaı dúken men qudyqqa júgirýden basqa lajy bolmady.
«Vodokanal» kásipornynyń qyzmetkerlerine KamAZ-ben arnaıy konteınerlerde tasymaldanǵan qubyrlardy ystyq sýmen qolmen jylytýlaryna týra keldi.
Máseleni sheshýge kommýnaldyq qyzmetterge 3 kún ýaqyt ketti. Áıteýir qazir sýmen qamtamasyz etý júıesi qalpyna keltirildi. Degenmen bul jaǵdaı qaıtalanýy múmkin.
Ótken jyly da qar kóshkini birneshe kún boıy sý arnasyn jaýyp tastaǵan. TÚKSh, jolaýshylar kóligi jáne avtomobıl joldary bóliminiń qyzmetkerleri tabıǵatqa ámir júrmeıtinin, bárin aldyn ala tolyqtaı boljaý múmkin emestigin aıtady. Dese de jelilerdi jańǵyrtý qajettigi sózsiz.
Eske salsaq, osyǵan deıin ShQO-da aýa raıyna baılanysty kólik qozǵalysyna shekteýler qoıylyp jatqany habarlanǵan.
