Rıdderde sportshy balalar jatqan qonaqúıden órt shyqty

ÓSKEMEN. QazAqparat – Shyǵys Qazaqstan oblysynyń Rıdder qalasynda qonaqúıdiń ishinde ornalasqan saýnada órt shyqqan, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, 29 tamyz kúni túngi saǵat 03:00 shamasynda Rıdderdegi 4-shi shaǵynaýdanda ornalasqan qonaqúı ishindegi saýnada órt tutanǵan. Qyzyl jalyn kıim aýystyratyn bólmeniń tóbesi men qabyrǵalaryn sharpydy.

«Oqıǵa ornyna shuǵyl jetken órt sóndirýshiler 15 sharshy metr aýmaqqa jaıylǵan jalyndy aýyzdyqtady. Qaýipsizdik maqsatynda qonaqúıde turyp jatqan 10 sportshy bala evakýatsııalandy. Órtti óshirýge 4 tehnıka men jeke quramnan 11 adam jumyldyryldy», - dep habarlady vedomstvo ókilderi.

Ottyń shyǵý sebebi elektr jabdyqtaryn montajdaý jáne paıdalaný kezinde órt qaýipsizdigi talaptaryn saqtamaýdan bolýy múmkin.