Rıdderde shý shyqqan mektepti arnaıy komıssııa tekseretin boldy
ÓSKEMEN. KAZINFORM — Rıdder qalasynyń № 11 jalpy bilim beretin mektep ujymy ózderine jasalǵan qysymdy toqtatýdy surap QR Oqý-aǵartý mınıstrine vıdeoúndeý joldady.
— Biz quzyrly mekemelerden mektebimizge kórsetilip otyrǵan psıhologııalyq qysymdy toqtatýǵa kómek kórsetýlerin suraımyz. Árbir muǵalim ózin mektepte qaýipsiz sezingisi keledi. Olar ujymnyń ishinde qurmetke, qoldaýǵa ábden laıyqty. Muǵalimge jasalatyn kez kelgen psıhologııalyq qysym qorqytý, kemsitý, usynysyn elemeý nemese negizsiz tekseris te mektep qundylyqtaryna qaıshy, — deıdi olar úndeýde.
Mektep ujymy osy kúnge deıingi jasalǵan negizsiz qysymnyń mánisin bylaı dep túsindirdi.
— Rıdder qalasy bilim bóliminiń basshysy B. A. Abıev qyzmetke kelgennen keıin mektebimizge jıi negizsiz tekserister kóbeıdi. Buǵan onyń qyzy 2 «A» synyby jetekshisiniń oqýshyǵa qol kótergen oqıǵasy sebep boldy dep esepteımiz. Ata-analardyń shaǵymy qaralǵanymen, ol eshqandaı jaýapkershilikke tartylmady, kerisinshe, kiná mektep dırektorynyń moınyna ilindi, — dedi mektep ujymy.
Olar mektep dırektorynyń qyzmetin asyra paıdalanatyndyǵyn da atap ótti.
— B. A. Abıev qyzmettik yqpalyn paıdalanyp qyzyna jeke kabınet bergizip, negizgi pánderge júkteme jáne dırektordyń orynbasary qyzmetin taǵaıyndaýdy talap etti. Qalalyq konkýrstarda onyń qyzynyń aldyńǵy oryndarǵa ıe bolýy, aqyly issaparlarǵa jıi jiberý áreketteri boldy. Bilim ordasyndaǵy jaǵdaıǵa ádil baǵa berilip, qysymnyń toqtatylýyn suraımyz, — delingen vıdeoúndeýde.
Osyǵan baılanysty ShQO Bilim basqarmasynan resmı túsinikteme berildi.
— Shyǵys Qazaqstan oblysy Bilim basqarmasy atynan arnaıy jumys toby qurylyp, máseleni zerdeleý úshin sol jerge jolǵa shyqqandyǵyn habarlaımyz. Nátıjeleri boıynsha qosymsha aqparat beriledi, — delingen aqparatta.
Vedomstvo ókilderi barlyq ustazdar jumysta, sabaq protsesi qalypty rejımde júrip jatqandyǵyn málim etti. Oqý protsesi de toqtaýsyz uıymdastyrylǵan.
Eske salaıyq, osyǵan deıin ShQO-da 35 myńǵa jýyq oqýshy qashyqtan bilim alyp jatqany habarlanǵan.