Rıdderde salynatyn jańa mektep memlekettik tilde oqytady
Rıdder qalasynda 600 oryndyq qazaq mektebi boı kótermek, dep habarlaıdy Kazinform.
Bıyl qańtar aıynda BAQ-ta jáne áleýmettik jelide Rıdderdegi jalǵyz qazaq mektebi ǵımaratynyń tozyp turǵany jaıly aqparat tarap, jurttyń narazylyǵyn týdyrǵan bolatyn. Sodan keıin jergilikti ákimdik bilim ordasyna kúrdeli jóndeý jumystaryn júrgizý týraly sheshim qabyldaǵan.
Al jańa oqý jyly bastalǵanda Rıdderdegi jalǵyz qazaq mektebi jabylǵany týraly málimet taraı bastady. Sol kezde ShQO bıligi bunyń shyndyqqa múlde sáıkes kelmeıtinin, jóndeý jumystarynyń qajettiligine baılanysty oqýshylardyń №11 mektepke ýaqytsha kóshirilgendigin málim etken.
Búgin Rıdderde jańa qazaq mektebi salynatyndyǵy belgili boldy. Osy maqsatta Shyǵys Qazaqstan oblysy men Rıdder qalasynyń ákimdikteri jáne «Kaztsınk» kompanııasy arasynda tıisti úshjaqty memorandýmǵa qol qoıyldy. Mekteptiń qurylysy 1 jarym jyldyń ishinde aıaqtalady dep kózdelgen.
«Rıdder qalasynda 16 mektep bar. Sol mektepterdiń kóbisi ótken ǵasyrdyń 30-shy jyldary salynǵan. Al sońǵy jarty ǵasyr ishinde tek 2022 jyly ǵana 1 mektep boı kótergen. Odan keıin jyl saıyn qazaq tildi mektepke degen suranys artyp kele jatyr. Máselen, 2021 jyly 1014 bala, 2022 jyly 1151 bala, 2023 jyly 1205 bala memlekettik tilde oqýǵa nıet bildirgen, - dedi oblys ákimi Ermek Kósherbaev.
