Rıdderde polıtseı mototsıkl júrgizýshisin qýamyn dep qaǵyp ketti

ÓSKEMEN. KAZINFORM – Shyǵys Qazaqstan oblysy Rıdder qalasynda mototsıklshilerdi toqtatpaq bolǵan ýchaskelik ınspektordyń ózi jol erejesin buzǵan. 

ShQO Polıtsııa departamentiniń málimetine súıensek, oqıǵa 16 tamyz kúni bolǵan. Áleýmettik jelide taraǵan vıdeoda kóringendeı, mototsıklshilerdi qýǵan tártip saqshysy qyzmettik avtokólikpen qarsy baǵytqa shyǵyp, joldaǵy tutas syzyqty kesip ótken.

Sonyń saldarynan kólik mototsıklshilerdiń birine soǵylǵan. Abyroı bolǵanda, eshkim zardap shekken joq.

— Ýchaskelik ınspektor júrgizýshi kýáliginsiz júrgen úsh mototsıkl júrgizýshisin ustamaq bolǵan. Alaıda kólik tizginine ıe bola almaı qaldy. Qyzmettik teris áreketke baılanysty ınspektorǵa qatysty tekseris bastaldy, — delingen aqparatta.

Al mototsıkl júrgizýshilerine qatysty ákimshilik sharalar qoldanyldy. Olar qujatsyz mototsıkl basqarǵany jáne manevr jasaý erejelerin buzǵany úshin jaýapqa tartyldy.

Eske salsaq, osyǵan deıin Qaraǵandy mańynda mototsıkl júrgizýshisi qaza bolǵany habarlanǵan.