Rıdderde ózenge aǵyp ketken kvadrotsıkl júrgizýshisin izdeý jumystary jalǵasyp jatyr
ÓSKEMEN. KAZINFORM — Shyǵys Qazaqstan oblysy Rıdder qalasynda Kedrovka ózenine aǵyp ketken 64 jastaǵy er adam áli tabylmaı jatyr.
Oqıǵa 31 tamyz kúni bolǵan. Kvadrotsıkl tizgindep kele jatqan er adam Kedrovka ózenine qulaǵan. Qasyndaǵy dosy óz betimen jaǵaǵa shyǵyp úlgergenimen júrgizýshini aǵyn alyp ketken. Sodan beri eriktiler men qutqarýshylar júrgizýshini izdestirip keledi.
— Іzdestirý jumystaryna qaıyqtar, ótimdiligi joǵary tehnıka men drondar tartylǵan. Alaıda Rıdder aımaǵynda jaýyn-shashyn tolastamaı, ózendegi sý deńgeıi kúrt kóterilip ketti. Ózenniń aǵysy óte qatty. Sondyqtan ázirge esh nátıje joq, — dep habarlady ShQO Tótenshe jaǵdaılar departamentinen.
Qutqarýshylarǵa kómek kórsetý úshin Býtakovo aýylynyń turǵyndar keldi. Qazir ózen arnasy men jaǵalaý boıy muqııat tekserilip jatyr.
— Eriktilerdiń óz qaıyqtary bar. Alaıda áýeden sholý jasaý úshin drondar jetispeıdi, — delingen aqparatta.
Eske salsaq, osyǵan deıin Almatyda samokat aıdaǵan jasóspirimder náreste arbasyn qaǵyp ketkeni habarlanǵan.