Rıdderde ózen tasyp, úılerdi sý basty
Rıdderdegi Harıýzovka ózeniniń arnasynda muz qatýynan sý deńgeıi kóterilip, úılerdi sý basty, dep habarlaıdy Kazinform.
8 jeltoqsan kúni túnde Kırov kóshesi, Óskemen burylysy men Harıýzovskıı burylysyndaǵy jeke sektordyń 4 aýlasy men Kırov kóshesindegi 2 jer úıdi sý basty.
«Rıdder qalasy TJB qyzmetkerleri jáne jergilikti atqarýshy organdar halyqty habardar etip, yqtımal evakýatsııa jaǵdaıynda jeke quram men quraldardy daıyndyqqa keltirdi. Halyqty ýaqytsha ornalastyrý úshin qala ákimdigi «Rıdder kolledji» KMM ǵımaratynda ornalastyrý pýnktin aldyn ala daıyndady. Halyq evakýatsııadan bas tartty», - dep habarlady ShQO ákimdiginen.
Qala ákimdigi men oblystyq TJD qutqarýshylary aýla aýmaqtary men úılerden sýdy soryp shyǵarý úshin motopompalardy iske qosty. Muzdan tazartý jáne ózen arnasyna qaraı eńis jasaý úshin arnaıy tehnıka tartyldy.
«Keltirilgen zalaldy baǵalaý úshin múddeli memlekettik organdar men uıymdar arasynan komıssııa quryldy. TJ saldaryn joıýǵa barlyǵy 20 adam, 7 tehnıka jáne 2 motopompa jumyldyryldy. «LK GES» JShS qyzmetkerleri sý aǵyzýdy azaıtty. Monıtorıng júrgizilýde. Tańǵy saǵat 7.30-daǵy jaǵdaı boıynsha aýla aýmaqtarynan sý ketti, tek jertólelerde qaldy. Oqıǵa ornyna ShQO ákimi Ermek Kósherbaev jáne oblystyq TJD basshylyǵy bardy», - delingen aqparatta.
