Rıdderde órtengen úıden erli-zaıyptylar qutqaryldy
ÓSKEMEN. QazAqparat – Shyǵys Qazaqstan oblysy Rıdder qalasynda órtengen úıden erli-zaıyptylar qutqaryldy, dep habarlaıdy QazAqparat tilshisi
ShQO tótenshe jaǵdaılar departamenti baspasóz qyzmetiniń málimetine súıensek, 10 qyrkúıekte túngi saǵat 02.00 shamasynda Rıdderdegi Semeı kóshesinde órt shyqty. Jeke turǵyn úıdiń aýlasynda «Volkswagen Golf» markaly avtokólik janǵan.
Qyzyl jalyn úıge de jaıylyp ketti. Órt úı kireberisiniń aǵash qurylymdaryn, qabyrǵalar men sharýashylyq qora-jaıdyń tóbesin sharpydy.
«Oqıǵa ornyna órt sóndirýshiler kelgenge deıin úıdiń janynan ótip bara jatkan Samat Berik pen Alekseı Leşenko kómekke umtylǵan. Olar 60 jastaǵy erli-zaıyptylardy qutqardy. Kóp uzamaı kelip jetken órt sóndirýshiler jalpy aýdany 35 sharshy metrdi quraǵan tilsiz jaýdy aýyzdyqtady», - delingen aqparatta.
Otqa qarsy kúreske jeke quramnan 9 adam jáne 3 tehnıka jumyldyrylǵan. Órttiń shyǵý sebebi - qaýiptiligi joǵary agregatpen abaısyz jumys atqarýdan bolýy múmkin.
