Rıdderde órtengen úıden er adam qutqarylyp, 3 gaz ballony shyǵaryldy
ÓSKEMEN. QazAqparat – Shyǵys Qazaqstan oblysy Rıdder qalasynda otqa oranǵan jer úıden er adam qutqaryldy, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, Rıdder qalasyndaǵy Borovaıa kóshesinde ornalasqan 3 bólmeli jer úıden órt shyqqan. Oqıǵa ornyna órt sóndirýshiler shuǵyl kelip jetti.
«Barlaý barysynda kireberiste edende 31 jastaǵy er adam jatqan. Qutqarýshylar ony lezde syrtqa alyp shyǵyp, jedel járdem dárigerlerine tapsyrdy. Sondaı-aq janyp jatqan úıden 3 gaz ballony shyǵaryldy», - dep habarlady vedomstvo ókilderi.
Kóp uzamaı tilsiz jaý tolyqtaı sóndirildi. Qazirgi ýaqytta órttiń shyǵý sebebi anyqtalyp jatyr.
