Rıdderde órtengen úıden áıel men onyń 2 balasy qutqaryldy
RIDDER. QazAqparat – Shyǵys Qazaqstan oblysy Rıdder qalasynda órt shalǵan jer úıden áıel men onyń 2 balasy qutqaryldy, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 17 tamyzda saǵat 18.31-de Ordjonıkıdze kóshesindegi ekiqabatty jeke turǵyn úıde órt shyqqan. Muny baıqaǵan kórshi Vadım Bedaev birden jergilikti PIK-ke júgirip kelip, slesardan súımen aldy da úıde qalǵan áıel men onyń balalaryna kómekke umtyldy.
«Taǵy bir kórshileri Sergeı Grebnevpen birge esikti buzǵan ol tútin basqan úıge eńbektep kirip, 5 jasar balany syrtqa alyp shyqqan. Sodan keıin oqıǵa ornyna jetken qutqarýshylardyń biri Daıyrbek Darhanmen birge jedel járdem kelgenge deıin balany aman alyp qalý úshin alǵashqy medıtsınalyq kómek kórsetýge tyrysty. Sonymen qatar PIK slesary Anatolıı Bobojko baspaldaq qoıyp, úıdiń 2-qabatyna kirdi de 26 jastaǵy áıeldi alyp shyqty. Eki jasar ekinshi balany órt sóndirýshi Shalqar Qonbaev qutqaryp, jedel járdem dárigerlerine tapsyrdy», - delingen aqparatta.
Kóp uzamaı jalpy aýdany 24 sharshy metrdi quraǵan qyzyl jalyn tolyqtaı aýyzdyqtalǵan. Qazirgi ýaqytta denelerin kúıik shalǵan áıel men onyń eki balasy aýrýhanaǵa jetkizildi. Órttiń shyǵýyna – otty abaısyz qoldaný sebep bolýy múmkin.
