Rıdderde órt shyqqan kópqabatty úıden 11 adam evakýatsııalandy
ÓSKEMEN. QazAqparat – Shyǵys Qazaqstan oblysy Rıdder qalasynda órt shyqqan kópqabatty úıden 11 adam evakýatsııalandy, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, Rıdder qalasynda kópqabatty úıdiń úshinshi qabatyndaǵy páterde órt shyqqan.
«Oqıǵa ornyna shuǵyl jetken qutqarýshylar barlaý kezinde tútin tumshalaǵan bólmelerdiń birinen es-tússiz jatqan er adamdy tapty. №1 mamandandyrylǵan órt sóndirý bóliminiń qyzmetkerleri Abylaı Adashanov pen Ashat Smaǵulov jedel járdem kelgenge deıin oǵan alǵashqy medıtsınalyq kómek kórsetti. Sodan soń 1958 jylǵy azamat aýrýhanaǵa jetkizildi», - delingen aqparatta.
Budan bólek, qutqarýshylar kópqabatty úıden 11 turǵyndy, onyń ishinde 1 balany evakýatsııalady. Kóp uzamaı jalpy aýdany 25 sharshy metrge jetken qyzyl jalyn aýyzdyqtaldy. Órttiń shyǵý sebebi – temeki shegý kezinde qaýipsizdik talaptaryn saqtamaýdan bolýy múmkin.
