Rıdderde ormanda serýendep júrgen 76 jastaǵy qarııa joǵalyp ketti
RIDDER. QazAqparat - Rıdder qalasynda qutqarýshylar joǵalǵan er adamdy tapty, dep habarlaıdy QazAqparat oblystyń tótenshe jaǵdaılar departamentine silteme jasap.
15 shilde keshke Rıdder qalasynyń qutqarýshylaryna er adamnan Konovalovka aýylynyń mańynda serýen kezinde 76 jastaǵy ákesi joǵalǵany týraly habar keldi.
16 shilde kúni tańerteń mamandandyrylǵan órt sóndirý bóliminiń qyzmetkerleri polıtsııa qyzmetkerlerimen birge aqsaqaldy izdeýge kiristi.
Jol talǵamaıtyn tehnıka mingen jáne jaıaý eki top barlyq jerdi qarap shyqty. Bul jumysqa joǵalǵan er adamnyń uly da qosyldy.
Omartalar, qaraýsyz qalǵan úılerdi súzip, adamdardan surastyrdy. Olar zeınetker joǵalǵan jerden shamamen 5-6 shaqyrym radıýsta júrip ótti.
Olar kelesi omartaǵa ótip, ózenge qaraı kelgende sýdyń janynda otyrǵan adamdy kórdi. Bul joǵalǵan kisi edi. Ol ózi adasyp ketken jerden 2 shaqyrym jerde bolǵan.
Qarııa óziniń adasyp ketkenin túsingen kezde sol orynnan tapjylmaı, ózin izdegen adamdardy kútken.
Kúndizgi saǵat 12-de izdeý operatsııasy aıaqtaldy.
Tabylǵan er adamdy medıtsına qyzmetkerleri qarap shyqty. Onyń jaǵdaıy birqalypty.
«Qarttar kóp jaǵdaıda ózine tolyq senimdi bolady. Olar aýyl-aımaqty oı-jyqpylyna deıin jaqsy biledi, sondyqtan aýyldan uzap, birneshe saǵat serýendeı beredi. Biraq árkim joldan adasýy múmkin. Dúrbeleń - sizdiń basty jaýyńyz. Adasqanyńyzdy túsingen sátte toqtańyz. Alǵa bir qadam jasamańyz. Zarıadtalǵan telefondy ózińizben birge ala ketýdi umytpańyz. Eger joǵalsańyz, barlyǵyna birden qońyraý shalmańyz, birden «112» biryńǵaı qutqarý telefonyn terińiz. Eger aldyńyzdaǵy joldy anyq kórseńiz, ol jaǵdaıda sizdi tabý ońaı bolady. Ormanǵa serýendep barǵanda ashyq tústi kıim kıińiz. Shaǵylysatyn elementteri bar kıim túngi izdeý jumysyn edáýir jeńildetedi. Jaqyndaryńyzǵa ormanda júgirgińiz kelse de, qaıda jáne qansha ýaqytqa baratynyńyzdy aıtýdy umytpańyz» dep eskertedi qutqarýshylar.
