Rıdderde ónerkásiptik nysanda topyraqtyń lastanýy men zań buzýshylyqtar anyqtaldy

ÓSKEMEN. KAZINFORM — Rıdder qalasynda jospardan tys ekologııalyq tekserý barysynda taý-ken baıytý kombınatynda topyraqtyń lastanýy men ekologııalyq erejelerdiń saqtalmaýy anyqtaldy.

Ekologııa departamentiniń habarlaýynsha, mamandar eki ret jospardan tys tekserý júrgizip, eski qaldyq qoımasynyń totyqtyrǵysh toǵanyndaǵy qaldyqtardyń relefte jatqanyn anyqtady.

— Zertteýler qaldyqtar qoımasynyń mańyndaǵy topyraqtyń aýyr metaldarmen lastanǵanyn anyqtady. Ony akkredıttelgen zerthana rastady, — dep habarlady vedomstvo.

Sonymen qatar, tekserý nátıjesinde ekologııalyq ruqsat talaptarynyń buzylǵany, naqtyraq aıtqanda, sý qaldyq bógetiniń búıirinen ótip, nátıjesinde jer betinde aǵyn paıda bolǵany belgili boldy.

— Sý bógetten asyp, jer betine jaıylyp jatqany anyqtaldy. Mundaı oqıǵalar ekologııaǵa zalal keltirý bolyp sanalady jáne shara qoldanýdy talap etedi, — dep atap ótti vedomstvo.

Tekserý qorytyndysy boıynsha kompanııa — «Shyǵys Qazaqstan taý-ken baıytý kombınaty», «Qaztsınk» JShS-ne anyqtalǵan buzýshylyqtardy joıý týraly uıǵarym shyǵaryldy. Seriktestik qoldanystaǵy zańnamaǵa sáıkes ákimshilik jaýapkershilikke tartyldy.

Ekologııalyq qyzmet qorshaǵan ortaǵa keri áserin tıgizetin óndiristik nysandarǵa monıtorıng jalǵasatynyn basa aıtty.

— Bizdiń maqsatymyz — zań buzýshylyqtardy jedel anyqtap, odan ári ekologııalyq zalaldyń aldyn alý. Bul salada monıtorıng júıeli júrgizilip jatyr, — dep tolyqtyrdy vedomstvo.

Qaldyq qoımasy aımaǵyndaǵy jaǵdaı ýákiletti organdardyń baqylaýynda.

Eske salaıyq, Óskemen qalasynda ekologtar sary tústi qar jaýǵany týraly aqparat túsken soń tekserý júrgizdi.