Rıdderde mas júrgizýshi polıtseılerden qashyp qutylmaq boldy

RIDDER. QazAqparat – Shyǵys Qazaqstan oblysy Rıdder qalasynda mas kúıde rýlge otyrǵan júrgizýshi polıtseılerden qashyp qutylmaq boldy, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, tártip saqshylary «Qaýipsiz jol» jedel aldyn alý sharasy aıasynda «Subaru» markaly avtokólikti toqtatqan. Alaıda júrgizýshi toqtaýdyń ornyna jyldamdyqty arttyrdy. Polıtseıler birden onyń sońyna túsken.

«Nátıjesinde, 29 jastaǵy jergilikti turǵyn tizgindegen kólik toqtatyldy. Tekserý kezinde júrgizýshiden alkogoldiń ótkir ıisi múńkip turdy. Sondaı-aq er adamnyń kólik basqarý quqyǵynan 2 jarym jylǵa aıyrylǵany anyqtaldy», - delingen aqparatta.

Quqyq buzýshydan qan alynyp, hımııalyq saraptama taǵaıyndaldy. Atalǵan fakti boıynsha QR QK-niń 346-baby 1-bóligine sáıkes sotqa deıingi tergeý amaldary bastaldy.