Rıdderde qutqarýshylar órtengen úıden 3 gaz ballonyn shyǵaryp úlgerdi
ShQO tótenshe jaǵdaılar departamenti baspasóz qyzmetiniń málimetine súıensek, órt 20 aqpanda Rıdderdegi Altaı kóshesinde shyqqan. Oqıǵa ornyna órt sóndirýshiler kelgen kezde jer úıdiń shatyry, tereze men esik bloktary, jıhaz, jeke zattar janyp jatty. Tilsiz jaý úı mańyndaǵy monshany da sharpyǵan.
«№1 mamandandyrylǵan órt sóndirý bólimshesiniń komandıri Evgenıı Babenko jáne aǵa órt sóndirýshi-qutqarýshy Dosjan Esimhanov janyp jatqan úıden 27 lıtrlik 3 gaz ballonyn syrtqa shyǵaryp úlgerdi. Kóp uzamaı jalpy aýdany 90 sharshy metrdi quraǵan qyzyl jalyn tolyqtaı aýyzdyqtaldy», - delingen aqparatta.
Órttiń shyǵý sebebi – elektr jabdyqtaryn ornatý jáne paıdalaný kezinde qaýipsizdik talaptaryn saqtamaýdan nemese otpen abaısyz jumys isteýden bolýy múmkin.