Rıdderde qoryqtan shyqqan órtke naızaǵaı sebep bolǵan

ÓSKEMEN. QazAqparat – Shyǵys Qazaqstan oblysy Rıdderdegi qoryqta shyqqan órt óshirildi, dep habarlaıdy QazAqparat tilshisi.

ShQO tótenshe jaǵdaılar departamenti baspasóz qyzmetiniń málimetine súıensek, 17 maýsymda Batys Altaı memlekettik tabıǵı qoryǵy aýmaǵynda, naqty aıtqanda Rıdder qalasynan 80 shaqyrym qashyqtyqta, jetýi qıyn taýly ári ormandy jerde órt shyqqan bolatyn.

Órt Chernýshka ózeni men Prıamoı bulaǵy qosylatyn ormandy alqapta shyǵyp, sol jerdegi aǵashtar janǵan.

Jalyndy sóndirýge TJD-dan, shekarashylar jáne ormanshylardan 58 adam men 9 tehnıka jumyldyryldy.

Tilsiz jaýdyń taralýy 18 maýsymda saǵat 6.45-te tejeldi.

«Búgin saǵat 14.00-de órt tolyqtaı sóndirildi. Qyzyl jalynnyń jalpy aýmaǵy 6 gektardy qurady», - delingen aqparatta.

Aldyn ala boljam boıynsha ot tutanýyna naızaǵaı sebep bolǵan.

Eske salsaq, osyǵan deıin Katonqaraǵaı aýdanyndaǵy orman órti tolyqtaı sóndirilgeni habarlanǵan.