Rıdderde kólik kópirden qulap ketti
ÓSKEMEN. KAZINFORM — Shyǵys Qazaqstan oblysy Rıdder qalasynda kólik kópirden qulap ketti.
Áleýmettik jelide Rıdderde kóliktiń kópirden qulaǵany týraly vıdeo tarady.
Onda bul oqıǵanyń 1 qańtar kúni bolǵany jazylǵan. Anyq-qanyǵyn bilý úshin ShQO polıtsııa departamentine habarlasyp kórdik.
Departamenttiń baspasóz qyzmeti jol-kólik oqıǵasynyń Rıdderde bolǵanyn rastady.
— Atalǵan fakti boıynsha azamat «Toyota Hilux» markaly kólikti basqara otyryp, joldaǵy meteorologııalyq jaǵdaılardy eskermeı, kópirdiń qorshaýyna soǵylyp, keıinnen aýdarylyp qalǵanyn habarlaımyz. Sonyń saldarynan júrgizýshi men jolaýshylar dene jaraqattaryn alǵan. Zań buzǵan kólik júrgizýshisine qatysty ákimshilik hattama toltyryldy, — delingen aqparatta.
Eske salsaq, osyǵan deıin Semeıde jarys kezinde Ertis ózenine kólik qulap ketkeni habarlandy.