Rıdderde qolǵa alynǵan jobalar kóp

Aımaq basshysy aldymen at basyn elektr qýatyn óndiretin «LK GES» JShS-ne buryp, eńsesin qaıta tiktegen baıyrǵy kásiporynnyń búgingi tynys-tirshiligimen tanysty. Qazir júzge tarta adamdy jumyspen qamtyǵan Úlbi ózenindegi gıdroqurylymdy qalypqa keltirý jumystary qyzý júrip jatyr.

Kásiporyn basshysy Dmıtrıı Boıarınovtyń aıtýynsha, bul jerde negizinen elektr qýaty óndirilip, ekinshi sý qoldanýshylarǵa sý berý qyzmeti kórsetiledi. Jaýapkershiligi shekteýli seriktestiktiń aldaǵy josparyna qaraı jyl sońyna deıin eki týrbına iske qosylmaq. Olardan jıyny 24 mVt elektr energııasy óndiriledi dep kútilýde. Mekeme byltyr 723 mln. teńgeniń ónimin óndirgen. Oblys basshysy óz kezeginde kórsetkishti arttyrýdy jáne turǵyndarǵa sapaly qyzmet kórsetýdi tapsyrdy.

Danıal AHMETOV Rıdderdegi «Qazaq orman sharýashylyǵy jáne agroormanmelıoratsııa ǵylymı-zertteý ınstıtýty» JShS Altaı fılıalynda da boldy. Atalǵan fılıal dırektory Andreı Kalachev 1959 jyldan qyzmeti bastalatyn, burynǵy Altaı orman tájirıbe stantsııasynyń murageri bolyp tabylatyn Altaı fılıalynyń negizgi qyzmeti óńirdegi orman sharýashylyǵyn jáne agroormanmelıoratsııany ǵylymı turǵyda zertteý ekendigine toqtaldy. Fılıal bazasynda aımaq basshysyna jergilikti kásipkerlerdiń aǵash óńdeý salasyndaǵy jańa jobalary tanystyryldy. Máselen, jeke kásipkerler N.Grıgorev, A.Tsykýnov, F.Ivanov jáne «Rıdderskıı DOK» JShS ókilderi ekinshi, úshinshi surypty aǵash qaldyqtaryn tereń óńdeý, qaldyqsyz óńdeý, aǵashtan túrli buıymdar jasaý, «OSB» taqtaıshalaryn óndirý jobalaryn oblys basshysynyń aldyna tartty. Alaıda, olardyń barlyǵy da jobalaryn iske asyrý jolynda memlekettiń qoldaýyna zárý. Al bankter nesıe berý úshin laıyqty kepildik múlik talap etedi. Osyǵan qatysty óz oıyn bildirgen Danıal AHMETOV aǵash óńdeý jobalaryn qolǵa alǵanda, eń birinshiden daıyndalǵan ónimdi ótkizý naryǵyn ábden zerdelep alýdy, bıznes-josparlardy nesıe berýshilerdiń seniminen shyǵatyndaı etip shynaıy ázirleýdi tapsyrdy.

Áleýmettik máseleler sheshimin taýyp keledi

Danıal AHMETOV Mıchýrın kóshesiniń boıynda salynyp jatqan 280 oryndyq balabaqshanyń qurylysymen de tanysty. Bul nysan da uzaqqa sozylǵan qurylystardyń qatarynda. Esterińizde bolsa, oblys basshylyǵy atalǵan nysanǵa bólingen qarjyny qaıtaryp alyp, ózge qurylystarǵa jumsaý máselesin de kótergen edi. Alaıda, balabaqshanyń qurylysyn jalǵastyrǵan jergilikti jańa merdiger kompanııa «Shyǵysstroıındýstrııa» JShS dırektory Vladımır Startsev jyldyń sońyna deıin tapsyrýǵa ýáde berip otyr. Qazir 150 adam jumys istep jatsa, alda olardyń sany eki esege deıin artpaq. Al qala ákimi Jomart Muratovqa qurylysty úzbeı baqylaýǵa alý júkteldi.

Rıdder qalasyna jumys saparynyń aıasynda aımaq basshysy «Nur Otan» partııasynyń qalalyq fılıalynda azamattardy jeke máseleleri boıynsha qabyldady. Qabyldaýǵa aldyn ala jazylǵan eki turǵynnyń máselesi de jeke bastyń qamynan góri áleýmettik mańyzǵa ıe bolyp shyqty.
Aldymen qabyldaýǵa kirgen Maıra Shákirqyzy Úlbi ózeni kóktemgi sý tasqyny kezinde jaǵalaýǵa jaıylyp, Ýlbastroı kentiniń turǵyn baspanalaryna, «Qazaqstan» saıajaı birlestigine, Rıdder men «Lenınogorskıı» demalys bazasy aralyǵyndaǵy jolǵa qaýip tóndiretinin másele etip kóterdi. Al Grıgorıı Nagovıtsyn «Almaty - Zaşıta» baǵytyndaǵy jolaýshylar poıyzy Óskemen qalasyna keshki saǵat 20.44 kezinde keletinin, ondaǵy Rıdderge baratyn jolaýshylar oblys ortalyǵynan 19.00-de attanyp ketetin sońǵy avtobýsqa úlgermeıtindigin, atalǵan poıyzdyń marshrýtyn Almatydan Lenınogorsk stantsııasyna deıin uzartý qajettiligin jetkizdi.

Kóterilgen máselelerdi muqııat tyńdaǵan oblys basshysy birinshi problemany sheshý úshin arnaıy komıssııa qurylatyndyǵyn aıtty. Sol komıssııanyń sheshimine sáıkes tıisti jumystar atqarylatyn bolady. Al poıyzdyń marshrýtyn uzartýdy qarastyrý oblystyq jolaýshy kóligi jáne avtomobıl joldary basqarmasynyń basshysy Berik Beısekenovke tapsyrdy.

Sondaı-aq, bul kúni oblys ákimi Rıdder qalasyndaǵy turǵyn úı qurylysy boıynsha da sala mamandarynyń qatysýymen jıyn ótkizdi. Banktiń oblystyq fılıalynyń dırektory Aınur Meıirbaevanyń aıtýynsha, Rıdder qalasyndaǵy banktiń 800-ge tarta salymshysynyń 300-i bank arqyly baspana alýǵa tolyq qabiletti. Sonymen birge rıdderlikterdiń jalaqysy oblys boıynsha eń joǵary bolyp sanalady eken. 

Qala ákimi Jomart Muratov qazirgi kezde 60 páterlik toǵyz baspananyń jobalyq-smetalyq qujattamalary daıyn ekendigin jetkizdi. Qarjy bolsa, sonyń ekeýin kelesi jyly bastap ketýge múmkindik bar. Jıyn qorytyndysy boıynsha 2017 jylǵa eki úıdiń qurylysy úshin oblystyq bıýdjetten qarjy bólýge sheshim qabyldandy. Páterler «Qazaqstannyń turǵyn úı-qurylys bankiniń» jelisi boıynsha tapsyrylmaq. Al qala ákimine qurylysty sapaly júrgizetin merdigerdi taýyp, barlyq protsedýralardy oıdaǵydaı uıymdastyrý kerektigi aıtyldy. 

Budan keıin Rıdderdegi hokkeı modýlin sport modýline beıimdep qaıta qurylymdaý jumystarymen tanysqan oblys basshysy merdiger mekeme «BEKI» JShS basshysyna sport nysanynyń edenin sapaly etip qaıta jasaýdy tapsyrdy. Sebebi, blok kirpishterdiń ústine bekitýsiz ornatylǵan eden biraz ýaqyttan soń syr berýi ábden múmkin. Munda da qala basshylyǵyna nysan jyl sońynda qoldanysqa berilgenshe úzdiksiz baqylaýǵa alý tapsyryldy. 
Oblys ákimi Danıal AHMETOV Rıdder qalasyna jumys sapary kezinde «S.N.Dýdkın» sharýa qojalyǵynyń 400 basqa arnalǵan taýarly-sút fermasynyń bazasynda Rıdder qalasyna qarasty sharýashylyqtardyń taýarly-sút fermalaryn qurý, mal bordaqylaý, aýylsharýashylyq ónimderin óndirý jobalarymen tanysty. 

Bul kúngi jumys saparynyń sońǵy nysany retinde oblys ákimi Rıdderdegi «Sınegore» demalys bazasyna toqtap, munda arnaıy uıymdastyrylǵan oblysta týrızmdi damytý boıynsha qolǵa alynǵan jobalardy aralap kórdi. Sonyń ishinde almatylyq kásipkerler qolǵa alyp otyrǵan «Arman Village» jobasy boıynsha bıznes-jospar quryp, ony qarastyrýdy tıisti oblystyq basqarmaǵa tapsyrdy.

- Oblystyń, onyń ishinde Rıdderdiń týrıstik áleýeti óte úlken. Oǵan Almatydan ózge de óńirlerden kásipkerler qyzyǵýshylyq tanytyp otyr. Jaqynda Qytaıdyń kórshiles óńirlerimen bul baǵytta mańyzdy kelissózder júrgizetin bolamyz. Qytaılyq týrıster toby buǵan deıin Úrjar, Zaısan aýdandarynda, Óskemen qalasynda bolyp ketti. Olar da osynda jobalar iske asyrýǵa yntaly. Qalada turǵyn úı alýǵa qyzyǵýshylyq joǵary. Ony biz bankpen birlese otyryp iske asyramyz. Qalada qurylystyń qarqyn alǵany qýantady. Balabaqsha, sport modýli qurylysy bıyl aıaqtalady. Keler jyly qaladaǵy segiz mektepke jóndeý jumystary júrgiziledi. Qysqa ázirlik te oıdaǵydaı júrgizilip jatyr. Kóp jumysty qajet etse de, aýylsharýashylyq salasy alǵa basyp keledi. Salalyq jobalarǵa qoldaý kórsetiletin bolady. Bul rette qala basshylyǵy óz mindetterin oıdaǵydaı atqaryp otyr, - dedi jumys saparyn qorytyndylaǵan oblys ákimi Danıal AHMETOV. 

Dáýren Allabergenuly