Rıdderde qoǵamdyq kólik tapshylyǵy máselesin sheshý úshin 20 jańa avtobýs satyp alynbaq

ÓSKEMEN. QazAqparat – Shyǵys Qazaqstan oblysy Rıdder qalasynda qoǵamdyq kólik tapshylyǵy máselesin sheshý úshin 20 jańa avtobýs satyp alynbaq, dep habarlaıdy QazAqparat tilshisi.

52 myńǵa jýyq adam turatyn Rıdderde qoǵamdyq kólik máselesi óte ózekti. Avtobýstardyń tapshylyǵynan halyq kóp ýaqytyn aıaldamalarda tosýmen ótkizýge májbúr. Qala ákimdiginiń málimetine súıensek, bul másele endi sheshimin tabady. Ol úshin Óskemendegi jańa merdiger kompanııamen memorandým jasalǵan.

«Kompanııa 20 jańa otandyq avtobýsty jetkizýge mindet aldy. Qazir qala boıynsha 14 eski avtobýs jolaýshy tasymaldaıdy. Rıdder halqyn qoǵamdyq kólikpen jetkilikti deńgeıde qamtý úshin barlyǵy 30 avtobýs kerek. Endi jańa qoǵamdyq kólikter alynsa, eskilermen qosqanda qala kóshelerinde 34 avtobýs júretin bolady», - deıdi qala ákiminiń mindetin atqarýshy Darhan Qosantaev.

Jańa avtobýstar Rıdderge osy jyldyń qyrkúıek aıynda keledi dep kútilýde. Bul maqsatta ákimdik tarapynan 98 mln teńgege jýyq sýbsıdııa bólingen.