Rıdderde qaskóı 3 balanyń anasyn tonap, óltirip ketti
ÓSKEMEN. QazAqparat – Shyǵys Qazaqstan oblysy Rıdder qalasynda qaskóı 3 balanyń anasyn óltirip ketken, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, 26 tamyzda tańerteń úıinen jumysqa ketken qalalyq ákimdik qyzmetkeri iz-tússiz joǵalǵan. Uıaly telefony sóndirýli turǵan áıeldi úıinde 8-11 jas aralyǵyndaǵy úsh balasy tosyp jatty.
Keshke qaraı orman ishinde júrgizilgen izdestirý sharalary barysynda onyń máıiti tabyldy. Zorlyqpen óltirilgen áıel adamnyń birneshe jerinde pyshaq jaraqattary bar. Oqıǵa ornyna Óskemennen prokýratýra basshylyǵy men krımınalıster dereý kelip jetti.
Birneshe kúnnen keıin jedel ýákilder kúdiktini ustady. Buryn birneshe ret sotty bolǵan 34 jastaǵy er adam óz kinásin moıyndaǵan. Jaýap alý kezinde ol qylmysqa marqumnyń kúmis buıymdary men sómkesin tartyp alý úshin barǵanyn aıtty.
«Qazirgi ýaqytta kúdikti qamaýǵa alyndy. Oǵan qatysty QR QK-niń 99 jáne 192-baptary boıynsha sotqa deıingi tergeý amaldary júrgizilýde. Osy baptar boıynsha er adam 20 jylǵa nemese ómir boıyna bas bostandyǵynan aıyrylýy múmkin», - dedi oblystyq PD bastyǵynyń orynbasary Talǵat Shaıahmetov.
Anasynan aıyrylǵan balalar jaqyn týystaryna qamqorlyqqa berildi. Jergilikti atqarýshy organ ókilderi olarǵa qajetti kómek kórsetýde.
