Rıdderde qarda júretin tehnıkamen taýǵa ketip adasqan 9 adam qutqaryldy

ÓSKEMEN. KAZINFORM – Shyǵys Qazaqstan oblysy Rıdder qalasynda polıtseıler men qutqarýshylar qarda júretin tehnıkalarmen taýǵa ketip joǵalyp ketken 9 adamdy qutqardy.

Toǵyz týrısten quralǵan top taýly aımaqqa qarda júretin tehnıkalarmen saparǵa shyqqan. Sol toptyń ishinde Zoıa Qyzyrova esimdi zeınetkerdiń uly da bolǵan. 

Tártip saqshylaryna qońyraý shalǵan ol ádette balasynyń keshke qaraı habarlasatynyn, alaıda bul joly qońyraý shalmaı, belgilengen ýaqytta qaıtyp oralmaǵanyn jetkizdi.

- Rıdder qalasy polıtsııa bóliminiń jedel kezekshisi, polıtsııa maıory Meıram Aztaev shuǵyl túrde qajetti sharalardy uıymdastyrdy. Týrısterdiń turǵylyqty mekenjaıyn anyqtaý úshin ýchaskelik ınspektordy jiberdi, tótenshe jaǵdaılar qyzmetimen baılanys ornatty, ótinishtiń tirkelýin qamtamasyz etip, barlyq tartylǵan bólimshelerdiń jumysyn úılestirdi, - dep habarlady ShQO polıtsııa departamentinen. 

Polıtsııa men qutqarýshylar spýtnıktik baılanys arqyly týrısterdiń naqty ornalasqan jerin anyqtady. Toǵyz adamnyń barlyǵy aman-esen tabylyp, úsik shalý belgileri baıqalǵan joq.

Oqıǵa ornyna qajetti qural-jabdyqtarmen birneshe tehnıka jumyldyrylyp, qutqarýshylar shuǵyl túrde attandy.

- Sol túni ómirimdegi eń aýyr kúızelisti bastan ótkerdim. Alaıda polıtsııa maıory Meıram Aıanulynyń sabyrlyǵy, senimdiligi men adamgershilik qoldaýy maǵan úmit syılady. Ol tek qyzmettik mindetin atqarýmen shektelmeı, shynaıy janashyrlyq tanytty. Meniń on nemerem bar, endi olarǵa polıtsııa qyzmetkerleri men olardyń kúndelikti erlikteri týraly únemi aıtyp otyramyn, - dep rızashylyǵyn bildirdi Zoıa Qyzyrova.

Eske salsaq, osyǵan deıin polıtsııa tabıǵatty qorǵaý maqsatynda ShQO orman alqaptaryn áýeden baqylaıtyny habarlanǵan.