Rıdderde qar jaýdy

ÓSKEMEN. KAZINFORM – Shyǵys Qazaqstan oblysynda aýa raıy kúrt sýytady. 

Rıdderde keshe qar jaýǵany týraly vıdeo jelide tarap ketti. Sınoptıkterdiń málimetinshe, búgin túnde oblystyń shyǵysy men soltústiginde taǵy qar aralas jańbyr jaýady.

– 29 mamyrda oblystyń shyǵys bóliginde jańbyr jaýady. Túnde jáne tańerteń tuman kútiledi. Soltústik-shyǵystan soǵatyn jeldiń ekpini sekýndyna 18 metrge jetedi. Aýa temperatýrasy túnde +1-den +6°-qa deıin, shyǵys pen soltústikte -2°-qa deıin sýytýy múmkin, - delingen habarlamada.

Taıaýda Marqakól aýdanynda synap baǵanasy -6°S-qa deıin tómendegen. Aldaǵy túnde Rıdder, Katonqaraǵaı, Glýbokoe jáne Marqakól aýdandarynda temperatýra 0-den tómen bolady dep kútilip otyr. 

– Kúndiz aýa temperatýrasy +15, +20° deıin kóteriledi. Biraq oblystyń shyǵysynda 10 gradýs jylydan aspaıdy. Al Óskemende jaýyn jaýmaıdy. Aýa temperatýrasy +17°-qa deıin jetedi, - delingen aqparatta.

Eske salsaq, osyǵan deıin búgin el aýmaǵynda jel kúsheıip, ońtústik óńirlerde shańdy daýyl turatyny habarlanǵan.