Rıdderde qar kóshkininen keıin halyq sýsyz qaldy

ÓSKEMEN. KAZINFORM – Shyǵys Qazaqstan oblysy Rıdder qalasynda burqasyn bolyp, jel ekpini sekýndyna 28 metrge deıin jetip tur. Qar da qalyń túsken.

Qala ákimdiginiń málimetine súıensek, 22 qańtar kúni saǵat 14:00-de Gromotýha ózeniniń mańyndaǵy taý shatqalynda qar kóshkini júrgen. Sonyń saldarynan «LK-GES» JShS-nyń sý jınaǵyshynda sý deńgeıi tómendep ketti.

- Halyqty sýmen qamtamasyz etý maqsatynda sý elektr stantsııasy men «Qaztsınk» JShS-ne sý berý ýaqytsha toqtatyldy. «Sý arnasy» kásipornyndaǵy rezervtik jer asty sý alǵyshyn iske qosýǵa daıyndyq júrip jatyr. Qar kóshkini sýmen shaıylady. Jaǵdaı baqylaýda, - delingen aqparatta.

Sınoptıkterdiń boljaýynsha, 23 qańtarda Shyǵys Qazaqstan oblysynda qar jaýyp, burqasyn men kóktaıǵaq bolyp, ekpini sekýndyna 28 metr bolatyn jel saqtalady.

Eske salsaq, osyǵan deıin Shyǵys Qazaqstan oblysynyń qutqarýshylary qys kezinde taýǵa shyqqanda qandaı qaýipsizdik erejelerin saqtaý kerektigin eske salǵany habarlanǵan.