Rıdderde qar kóshkini ózen arnasyn jaýyp qaldy

ÓSKEMEN. QazAqparat – Shyǵys Qazaqstan oblysy Rıdder qalasynda qar kóshkini ózen arnasyn jaýyp qaldy, dep habarlaıdy QazAqparat tilshisi.

ShQO tótenshe jaǵdaılar departamenti baspasóz qyzmetiniń málimetine súıensek, «Rıdder-Chekmar» tasjolynyń 41-shaqyrymynda qar kóshkini júrip, Belaıa Ýba ózeniniń arnasyn jaýyp qalǵan.

Soǵan baılanysty muz keptelisi men jaqyn mańdaǵy úılerdi sý basýynyń aldyn alý úshin jergilikti atqarýshy organdar men qutqarýshylar jarylys jumystaryn júrgizdi.

Ózendegi jarylystan usaqtalǵan muzdyń jalpy aýdany 4500 sharshy metrdi quraǵan.

«Jalpy oblys boıynsha muz keptelý qaýpi joǵary 16 ýchaske bar. Onda naýryz aıynyń basynan beri muzdy usaqtaý úshin profılaktıkalyq jarylystar jasalýda. Nátıjesinde eldi mekenderdi sý basý qaýpi barynsha azaıtylyp jatyr», - deıdi oblystyq TJD bastyǵynyń orynbasary Arman Toqanov.