Rıdderde qalǵan jalǵyz ardager qaıtys boldy
ÓSKEMEN. KAZINFORM — Shyǵys Qazaqstan oblysy Rıdder qalasynda Ekinshi dúnıejúzilik soǵystyń sońǵy ardageri ómirden ótti.
Pavel Alboha 101 jasqa qaraǵan shaǵynda dúnıeden ozdy. Ol Ýkraınadan Chehoslovakııaǵa deıingi maıdan jolynan ótken. Soǵystan keıingi jyldary Rıdder qalasynda túrli salada uzaq ýaqyt eńbek etken. Bul týraly qala ákimdiginen habarlady.
— Rıdderdegi maıdanger urpaqtyń sońǵy kýágerimen qoshtastyq. Tózim men abyroıdyń sımvolyna aınalǵan azamattyń jarqyn beınesi jadymyzda máńgi saqtalady, — delingen aqparatta.
Pavel Prokofevıch 1924 jyly dúnıege kelgen. Avıatsııalyq baılanys ýchılışesin támamdaǵan soń 565-shi shabýyldaýshy avıatsııalyq polkte radıoapparatýra mehanıgi bolyp qyzmet atqardy. Ýkraına, Polsha jáne Chehoslovakııa aýmaqtaryndaǵy shaıqastarǵa qatysyp, Jeńisti maıdanda qarsy aldy.
Kórsetken erligi úshin «Otan soǵysy» ordenimen, «Jaýyngerlik erligi úshin» jáne «Germanııany jeńgeni úshin» medaldarymen marapattalǵan.
1960 jyldan bastap ol Rıdder qalasynda turdy. Kirpish zaýytynda, turǵyn úı qurylysynda, jylý elektr ortalyǵynda eńbek etip, qalanyń damýyna úles qosty.
Eske salsaq, buǵan deıin Ekinshi dúnıejúzilik soǵystyń Shyǵys Qazaqstan oblysy Altaı aýdanyndaǵy sońǵy ardageri ómirden ozǵany habarlanǵan.