Rıdderde eki jyl buryn qurylysy bastalǵan emhana áli salynbaı tur

ÓSKEMEN QazAqparat – Shyǵys Qazaqstan oblysy Rıdder qalasynda eki jyl buryn qurylysy bastalǵan emhana qarjy bólinbegendikten salynbaı tur, dep habarlaıdy QazAqparat tilshisi.

Qala ákimdiginiń málimetine súıensek, Rıdderdegi emhana men kópsalaly aýrýhana kesheniniń qurylysy qarjy bólinbeýi saldarynan aıaqtalmaǵan. Eki iri medıtsınalyq mekemeniń qurylysy 2021 jyly bastalǵan.

«140 oryndyq kópsalaly aýrýhana kesheni men 500 kelýshige arnalǵan emhananyń qurylysyn jalǵastyrýǵa qarjy bólinbeı keledi. Bul jobalardyń jalpy quny – 25 mlrd teńge. Byltyr úsh mıllıard teńge ıgerildi. Al bıyl áli qarjy bólinbedi», - deıdi Rıdder qalasy ákiminiń mindetin atqarýshy Darhan Qosantaev.

Onyń aıtýynsha, ákimdik osy jyly respýblıkalyq bıýdjetten segiz mlrd teńge qarajat bólýge bıýdjettik ótinim bergen.