Rıdderde eki jasar bala úshinshi qabattyń terezesinen qulap ketti

ÓSKEMEN. QazAqparat – Shyǵys Qazaqstan oblysy Rıdder qalasynda eki jasar bala úshinshi qabattaǵy terezeden qulap ketti, dep habarlaıdy QazAqparat tilshisi.

Qalalyq TJB málimetine súıensek, eki jasar bala besqabatty turǵyn úıdiń úshinshi qabatyndaǵy terezeden qulap ketken. Oqıǵa bala birneshe mınýtqa ǵana eresekterdiń qaraýynsyz qalǵanda boldy.

Abyroı bolǵanda, búldirshin aman qalǵan. Ata-anasy birden jedel járdemge qońyraý shaldy.

«Bala túrli dene jaraqattarymen Rıdder qalalyq aýrýhanasynyń jansaqtaý bólimine jatqyzyldy. Qazirgi ýaqytta onyń jaǵdaıy ortasha aýyr», - delingen aqparatta.

Osy rette, óńir qutqarýshylary qaıǵyly jaǵdaıdyń aldyn alý úshin ne isteý kerektigin túsindirdi.

Júrgizilgen taldaý nátıjesinde, terezeden qulaǵan balalar negizinen 1-3 jasta bolatyny anyqtaldy. Negizgi sebepter - balany qaraýsyz qaldyrý jáne terezeni ashýǵa jol bermeıtin qorǵanys quraldarynyń bolmaýy.

«Oqys oqıǵa ata-analar úlken balalaryna kishilerin qaraýdy tapsyrǵan kezde de bolady. Keıbireýler tipti bes jasar balasyn «úlken» dep sanap, oǵan bir jasar búldirshinge bas-kóz bolýdy tapsyryp jatady. Bul múlde durys emes. Bala eresekter sııaqty jaýapkershilikti sezine almaıdy. Keıbir ata-analar kishkentaı balalaryn kóshege, qustarǵa, kólikterge qaratý, ákesine nemese sheshesine qol bulǵaý úshin tereze aldyna ózderi shyǵarady. Sonyń saldarynan bala bıiktiktiń qanshalyqty qaýipti ekenin túsinbeıdi», - deıdi ShQO TJD psıhology Svetlana Andrýsenko.

Balalar moskıt toryna súıenip, terezeden qulap ketýi múmkin. Shybyn-shirkeıdi úıge kirgizbeıtin moskıt tor eshqashan balalarǵa qorǵan bola almaıdy. Kerisinshe ondaı tor qaıǵyly jaǵdaıǵa sebepker bolady. Óıtkeni bala ózin qaýipsiz sezinedi de oǵan súıenedi.

Oqys oqıǵanyń aldyn alǵyńyz kelse:

- Balalardy qaraýsyz qaldyrmańyz.

- Páter terezelerine arnaıy qorǵanys quraldary qoıylýy tıis.

- Bala ózdiginen asha almaıtyndaı etip tereze tutqasyn qulyptańyz.

- Balanyń tereze aldyna shyǵýyna jol bermes úshin jıhazdyń barlyq túrin terezelerden alysqa qoıyńyz.

- Balany tereze aldyna shyǵaryp, kóshede ne bolyp jatqanyn kórsetýge úıretpeńiz. Ol siz joqta sony qaıtalaýy múmkin.

- Balalarǵa eresekterdiń qaraýynsyz balkonǵa shyǵýǵa ruqsat bermeńiz.