Rıdderde dáriger qaıtys bolǵan adamnyń atyna tramadol jazyp berip otyrǵan
ÓSKEMEN. KAZINFORM — Shyǵys Qazaqstan oblysy Rıdder qalasynda qaıtys bolǵan adamnyń atyna psıhotroptyq zattarǵa retsept jazyp otyrǵan dárigerge qatysty sotqa deıingi tergeý bastaldy.
ShQO prokýratýrasy baspasóz qyzmetiniń málimetine súıensek, prokýrorlyq tekserý barysynda Rıdder qalalyq aýrýhanasynda esirtki, psıhotroptyq nemese ýly zattarmen jumys isteý erejelerin buzý faktisi anyqtaldy.
«Tramadol — elimizde psıhotroptyq zattardyń tiziminde. Ony onkologııasy bar naýqasqa dárigerdiń retsepti boıynsha ǵana ótkizýge jáne berýge ruqsat etilgen. Qalalyq aýrýhananyń onkolog-dárigeri atalǵan talaptardy buzyp, psıhotroptyq preparatty onkologııa aýrýynan qaıtys bolǵan adamǵa taǵaıyndaǵan. Sodan soń retseptti psıhoaktıvti zattardy qoldanatyn basqa adamǵa berip otyrǵan» delingen aqparatta.
Rıdder qalasynyń prokýrory esirtki, psıhotroptyq nemese ýly zattarmen jumys isteý qaǵıdalaryn buzǵan dárigerge qatysty QR QK-niń 303-baby 1-bóligi boıynsha sotqa deıingi tergeýdi bastady.
