Rıdderde bótenniń kóligin aıdap ketken er adam ustaldy

ÓSKEMEN. QazAqparat – Shyǵys Qazaqstan oblysy Rıdder qalasynda bótenniń kóligin aıdap ketken er adam ustaldy, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, tártip saqshylaryna 44 jastaǵy jergilikti turǵyn júgingen. Óz sózinde ol belgisiz bireýdiń Gagarın dańǵylyndaǵy aýlada turǵan «VAZ» markaly kóligin aıdap ketkenin jetkizdi. Osylaısha, jábirlenýshige 1 500 000 teńge mólsherinde zalal keltirilgen.

«Dereý barlyq jeke quramǵa aqparat berilip, «Tosqaýyl» jospary jarııalandy. Polıtsııa qyzmetkerleri 30 mınýt ishinde kúdiktini qolǵa túsirgen. Tergeý barysynda ol óz kinásin moıyndady. Ustalǵan azamatqa qatysty eshqaıda ketpeý týraly qolhat túrinde bultartpaý sharasy tańdaldy», - dedi oblystyq PD bastyǵynyń birinshi orynbasary Eldos Zakımov.

Qazirgi ýaqytta atalǵan fakti boıynsha QR QK-niń 200-baby 1-bóligine sáıkes sotqa deıingi tergeý amaldary júrgizilýde.