Rıdderde bank qyzmetkeri 32 mln teńge jymqyrǵan

ÓSKEMEN. KAZINFORM – Shyǵys Qazaqstan oblysy Rıdder qalasynda 32 mln teńge jymqyrǵan bank qyzmetkeri sottaldy. 

Rıdder qalalyq soty baspasóz qyzmetiniń málimetine súıensek, áıel adam bankterdiń birinde kassalyq operatsııalar bóliminiń basshysy bolyp jumys istegen. Ótken jyldyń jeltoqsan aıynyń 11-20 aralyǵynda ol 31 900 000 teńgeni jeke shotyna aýdaryp alǵan. Kún saıyn 2,5 mln-nan 5 mln teńgege deıin aýdaryp otyrǵan.

«Aıyptalýshynyń kinási qarajattyń jetispeýshiligi anyqtalǵan eseppen, qolma-qol aqshany tekserý aktisimen, kýágerlerdiń bergen jaýaptarymen, beınejazbalarmen jáne basqa da dáleldermen rastaldy. Sot sheshimimen sottalýshy 7 jyl 1 aı merzimge bas bostandyǵynan aıyryldy. Sondaı-aq oǵan 7 jyl boıy bank qyzmetine qatysty laýazymdarda jumys isteýge tyıym salyndy», - delingen aqparatta. 

Úkim áli zańdy kúshine engen joq.

Buǵan deıin ShQO-da kommýnaldyq kásiporyn esepshisi 12 mln teńge jymqyrǵanyn jazǵan edik.