Rıdderde aıý qonjyǵymen birge jer úıdiń aýlasyna kirip ketti
ÓSKEMEN. KAZINFORM — Rıdder qalasynda qonjyǵymen birge jer úıdiń aýlasynda júrgen aıýdyń vıdeosy tarady.
Rıdderlikter aıýdyń qala aýmaǵyna kirip, kóshelerde, turǵyn úılerdiń aýlalarynda, tipti mektepterge jaqyn jerlerde júrgendigin aıtyp, dabyl qaǵyp jatyr. Olar áleýmettik jelilerge túrli vıdeolar da jarııalap jatyr.
Máselen, myna vıdeoda qonjyǵyn ertken aıýdyń jer úı aýlasynda júrgeni baıqalady.
— Bizdi balalarymyzdyń qaýipsizdigi alańdatady. Quzyrly organdar tıisti sharalar qabyldasa deımiz! — deıdi qala turǵyndary.
ShQO Tabıǵı resýrstar jáne tabıǵat paıdalanýdy retteý basqarmasy orman jáne ańshylyq sharýashylyǵy jedel áreket etý jasaǵynyń málimetine súıensek, qazirgi ýaqytta mamandar Rıdderge kelip jetken.
- Inspektorlar tıisti jumystardy qolǵa aldy. Olar aıýlardyń qozǵalysyn baqylap, úrkitip, qala aýmaǵynan shyǵarý sharalaryn júrgizedi, — delingen aqparatta.
Eske salsaq, osyǵan deıin Kólsaı ulttyq parkinde qońyr aıý baıqalǵany habarlanǵan.
