Rıdderde aýrýy asqynǵan áıel Óskemenge tikushaqpen jetkizildi
ÓSKEMEN. KAZINFORM – Shyǵys Qazaqstan oblysy Rıdder qalasynda aýrýy asqynǵan áıelge kómek kórsetý úshin tikushaq tartyldy.
ShQO Tótenshe jaǵdaılar departamenti baspasóz qyzmetiniń málimetine súıensek, habar túse salysymen TJM tikushaǵy kómekke keldi.
- «Qazavıaqutqarý» ushqyshtary Sergeı Pınıgın men Baýyrjan Bótenbaev sanıtarlyq avıatsııa dárigerleri Aıgúl Kúderbaeva jáne Bek Asaýbaevtyń súıemeldeýimen shuǵyl medıtsınalyq kómekke muqtaj patsıentti tikushaqpen Rıdder qalasynan Óskemenge jedel jetkizdi. Ushqyshtar men dárigerler komandasy qaýipsiz ushýdy qamtamasyz etip, áıel adamdy oblys ortalyǵyndaǵy medıtsınalyq mekeme qyzmetkerlerine tapsyrdy, - delingen aqparatta.
Osylaısha, sanıtarlyq avıatsııa jedel kómek kórsetip, adamnyń ómirin saqtap qalýǵa kómektesti.
Eske salsaq, osyǵan deıin Italııa kýrortyndaǵy aspaly jolda apat bolyp, týrısterdi tikushaqpen evakýatsııalaǵany habarlanǵan.