Rıdderde anasyn uryp óltirgen er adam túrmege qamaldy
ÓSKEMEN. QazAqparat – Shyǵys Qazaqstan oblysy Rıdder qalasynda anasyn uryp óltirgen er adam 6 jylǵa bas bostandyǵynan aıyryldy, dep habarlaıdy QazAqparat tilshisi.
Bul jaıly Rıdder qalalyq sotynyń baspasóz qyzmeti habarlap otyr.
«QR Qylmystyq Kodeksiniń 106-baby 3-bóligine (densaýlyqqa qasaqana aýyr zııan keltirip, abaısyzda jábirlenýshiniń ólimine ákep soqtyrǵan) sáıkes qaralǵan qylmystyq is máresine jetti. Belgili bolǵandaı, ótken jyldyń 30 qarashasynda ishimdik ishken aıyptalýshy týyndaǵan janjal barysynda anasynyń betine birneshe ret soqqy jasaǵan. Osynyń saldarynan aýyr dárejedegi dene jaraqatyn alǵan áıel adam kóz jumdy. Sot barysynda sottalýshy óz kinásin tolyqtaı moıyndap, istegen isine ókinetindigin jetkizdi», - delingen habarlamada.
Sot qaýlysy boıynsha aıyptalýshy 6 jyl merzimge bas bostandyǵynan aıyryldy. Eki tarap ta úkimmen kelisip, apellıatsııalyq shaǵym túsirmegen. Úkim tolyqtaı zańdy kúshine endi.
