Rıdderde alıment tólemeı júrgen boryshkerlerden 15,6 mln teńge óndirildi
ÓSKEMEN. KAZINFORM – Shyǵys Qazaqstan oblysy Rıdder qalasynda alıment tólemeı júrgen boryshkerlerden 15,6 mln teńge óndirildi.
Prokýratýranyń aralasýynan keıin alıment tóleýden jaltaryp júrgen 19 boryshker kámeletke tolmaǵan balalardy asyraýǵa arnalǵan beresheginiń bir bóligin ótedi.
- Ótelgen qaryzdyń jalpy somasy 15,6 mln teńge. Prokýratýra júrgizgen tekserý barysynda jeke sot oryndaýshysynyń alıment boıynsha bereshekti óndirip alý úshin qajetti sharalardy qabyldamaǵany anyqtaldy. Prokýrorlyq qadaǵalaý aktisi engizilgennen keıin boryshkerlerge túsindirý jumystary júrgizilip, nátıjesinde olar qaryzdarynyń bir bóligin óteýge májbúr boldy, - dep habarlady ShQO prokýratýrasynan.
Sonymen qatar jyl basynan beri QR Qylmystyq Kodeksiniń 139-baby boıynsha balalardy asyraý jónindegi mindetterin oryndamaǵandarǵa qatysty 20 qylmystyq is sotqa joldanǵan. Onyń 15-i boıynsha aıyptaý úkimi shyǵaryldy.
Eske salsaq, osyǵan deıin Oralda alımentten jaltarǵan er adam bás tigýge 4 mln teńge jumsaǵany habarlanǵan.
