Rıdderde alıment tólemegen adam túrmege qamaldy

ÓSKEMEN. KAZINFORM — Shyǵys Qazaqstan oblysy Rıdder qalasynda balasyna alıment tólemegen er adam sottaldy. 

Alıment tóleýden jaltaryp júrgen adamnyń isi ShQO kámeletke tolmaǵandardyń isteri jónindegi mamandandyrylǵan aýdanaralyq sotynda qaralǵan.

Sot sheshimimen ol Qylmystyq kodekstiń 139-baby boıynsha kináli dep tanylyp, 1 jylǵa bas bostandyǵynan shektelgen edi. Aıyptalýshyǵa sot birqatar mindet júktedi.

— Alaıda er adam budan durys qorytyndy shyǵarmaı, jumysqa ornalasý jáne alıment boıynsha bereshekti óteý mindetterin oryndamaı qoıdy. Osyǵan baılanysty Rıdder qalalyq sotynyń sheshimi boıynsha bas bostandyǵyn shekteý jazasy bas bostandyǵynan aıyrýǵa qatańdatyldy. Sottalýshy qaýipsizdigi ortasha túzeý mekemesine qamaýǵa alyndy, — dep habarlady sottyń baspasóz qyzmetinen.

Úkim tolyqtaı zańdy kúshine endi.

Aıta keteıik, byltyr ShQO-da alıment tólemegen adam alǵash ret túrmege qamalǵan bolatyn. Alıment boıynsha qaryzy 2 mıllıon teńgeden asqan er adam 9 aıǵa bas bostandyǵynan aıyrylǵan edi.