Rıdderde 5 jastaǵy sábı tórtinshi qabattan qulap ketti
RIDDER. QazAqparat – Shyǵys Qazaqstan oblysynda bes jasar bala tórtinshi qabattan qulap ketti, dep habarlaıdy QazAqparat tilshisi Shyǵys Qazaqstan oblystyq Tótenshe jaǵdaılar departamentiniń baspasóz qyzmetine silteme jasap.
Shyǵys Qazaqstan oblystyq Tótenshe jaǵdaılar departamentiniń habarlaýynsha, oqıǵa búgin, 28 shildede Rıdder qalasynda boldy. Bes jáne jeti jastaǵy aǵaıyndylar ájesiniń úıinde bolǵan. Balalar zalda oınap júrip, kenetten kóshede júk kóliginiń shýyn estıdi. Kólikti kórý úshin terezege shyǵyp, kishisi baıqaýsyzda terezeden qulap ketti. Qazirgi ýaqytta bala aýyr halde qalalyq aýrýhanada jatyr.
«2 jastan 7 jasqa deıingi balalardyń terezeden qulap ketý qaýpi joǵary. Mundaı qaıǵyly jaǵdaılardy boldyrmas úshin balalardy eresekterdiń qaraýynsyz qaldyrmaý kerek. Sonymen qatar, úıdegi jıhazdy bala terezege shyǵa almaıtyndaı ornalastyrǵan durys. Terezedegi torǵa senýdiń qajeti joq, sebebi olardyń eń sapaly degeniniń ózi balanyń salmaǵyn kótere almaıdy. Balanyń terezeni birneshe santımetrden artyq ashýyna múmkindik bermeıtin arnaıy qurylǵy (fıksator) ornatý qajet», - dedi Rıdder qalasy Tótenshe jaǵdaı basqarmasynyń ókili Renat Sarmýldınov.
