Rıdderde 350 mln teńgeniń kontrafaktilik óniminiń saýdasyna tosqaýyl qoıyldy
ÓSKEMEN. KAZINFORM – Shyǵys Qazaqstan oblysy Rıdder qalasynda kásipker 350 mln teńgege baǵalanǵan zańsyz alkogol men temekini satpaq bolǵan.
Óńir prokýratýrasy zańsyz kásipkerliktiń jolyn kesti. Rıdderde jalpy quny 350 mln teńgeni quraıtyn jalǵan esepke alý-baqylaý markalary bar 51 myń shólmekten astam sýrrogat alkogoli men 348 myń qorap temeki ónimderin satpaq bolǵan adam ustaldy.
«Sapasy kúmándi kontrafaktilik ónimderdi satý jáne olardy tutyný óte qaýipti. Óıtkeni ol azamattardyń densaýlyǵyna orasan zııan keltirýi múmkin. Rıdder qalalyq sotynyń úkimimen jeke kásipker kináli dep tanylyp, ónimderi tárkilenip, shartty túrde bas bostandyǵynan aıyryldy», - dep habarlady ShQO prokýratýrasynyń baspasóz qyzmeti.
Oblys prokýratýrasy, ekonomıkalyq tergeý men ekologııa departamentteri ókilderinen jáne sot oryndaýshylarynan turatyn komıssııa tárkilengen ónimderdi Óskemen qalasyndaǵy polıgonǵa aparyp, joıdy.
Eske salsaq, osyǵan deıin ShQO-ǵa basqa óńirden kelgen esirtki taratýshy ustalǵany habarlanǵan.
