Rıdderde 30 sibir shyrshasyn zańsyz qazyp alǵan elorda turǵyndary ustaldy
RIDDER. QazAqparat – Rıdder qalasynda 30-dan astam sibir shyrshasyn zańsyz qazyp alǵan tórt elordalyq ustaldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, Rıdder qalalyq tabıǵat qorǵaý polıtsııasynyń qyzmetkerleri «Brakoner» jedel aldyn alý sharasy barysynda Nur-Sultan qalasynyń 4 turǵynyn ustady. Olar 34 túp sibir shyrshasyn tamyrymen zańsyz qazyp alǵan.
Anyqtalǵandaı, elordalyqtardy Rıdder qalasynyń 53 jastaǵy turǵyny shaqyrǵan. Er adam olarǵa sibir shyrshasyn astanaǵa alyp ketý úshin kómek kórsetti.
«Qazirgi ýaqytta atalǵan fakti boıynsha QR QK-niń 188-baby 2-bóligine sáıkes sotqa deıingi tergeý amaldary bastaldy. Zattaı dáleldemeler alynǵan. Memleketke keltirilgen zalal mólsheri anyqtalýda», - dedi oblystyq PD bastyǵy Saǵat Mádıev.
Kúdiktiler 5 jylǵa deıingi merzimge bas bostandyqtarynan aıyrylýy múmkin.
