Rıdderde 150-ge jýyq «Sergek» kamerasy ornatylady

ÓSKEMEN. QazAqparat – Shyǵys Qazaqstan oblysy Rıdder qalasynda 150-ge jýyq «Sergek» kamerasy ornatylady, dep habarlaıdy QazAqparat tilshisi.

Qala ákimdiginiń málimetine súıensek, Rıdder kóshelerine «Sergek» beınebaqylaý júıesiniń kameralary ornatylady. Maqsat – qoǵamdaǵy jáne joldaǵy qaýipsizdikti qamtamasyz etý, qylmys pen ákimshilik quqyqbuzýshylyq jasaıtyndardy anyqtaý.

«Qazirgi ýaqytta júıeni iske qosý úshin tıisti jumystar atqarylyp jatyr. Barlyǵy 139 kamera ornatý josparlanyp otyr. Kameralardyń qaı jerlerge qoıylatyny sheshildi», - deıdi Rıdder qalasy ákiminiń mindetin atqarýshy Darhan Qosantaev.

Onyń aıtýynsha, bıylǵy qańtar-mamyr aılary aralyǵynda Rıdder boıynsha barlyǵy 275 qylmys tirkelgen. «Sergek» beınebaqylaý júıesi iske qosylǵannan keıin qylmys sany azaıady dep boljanady.