Rıdder jylý ortalyǵyndaǵy 3 qazandyqta jóndeý jumystary aıaqtaldy

Shyǵys Qazaqstan oblysy Rıdder qalasyndaǵy jylý elektr ortalyǵynda 3 qazandyqty jóndeý jumystary aıaqtaldy, dep habarlaıdy QazAqparat tilshisi.

Qala ákimdiginiń málimetine súıensek, Rıdder jylý elektr ortalyǵyndaǵy jóndeý jumystary belgilengen kestege sáıkes júrgizilip jatyr.

«Ortalyqtaǵy 1, 2, 3 qazandyq agregattary boıynsha jumystar aıaqtaldy. Qazandyqtar odan ári jýyp-tazalaý úshin sýmen toltyryldy. Jýý protsesi birneshe saǵattan eki táýlikke deıin sozylady. Qysym paıda bolǵannan keıin qazandyqtan jaǵyla bastaıdy», - deıdi qala ákimi Dáýlet Batyrbaev.

Merdiger uıym «DM Energy» JShS-nyń bas ınjeneri Qaırat Dosanovtyń aıtýynsha, dánekerleý jumystary aıaqtalyp, birinshi qazandyq toltyrylǵan soń, gıdravlıkalyq synaqtar júrgiziledi.

«Barlyq jumys ýaqtyly júrgizilip jatyr. Eń aldymen úshinshi qazandyq agregatyn iske qosýǵa daıyndap jatyrmyz. Qubyr júıesin montajdaý boıynsha jumystar aıaqtaldy. Merdiger bolǵan soń bizdiń negizgi mindetimiz – qandaı da bir kemshilik anyqtalǵan jaǵdaıda ony jedel joıyp otyrý», – deıdi taǵy bir merdiger – «Perspektıvti tehnologııalar» JShS bas ınjeneri Aleksandr Matvıenko.

Barlyq jóndeý-iske qosý jumystary aıaqtalǵannan keıin rıdderlikterdiń úılerine jylý berile bastaıdy.

Eske salsaq, osyǵan deıin Rıdderdegi jylý elektr ortalyǵynda kadr tapshylyǵy máselesi bar ekenin habarlaǵan edik.