Rıdder jylý ortalyǵyn durys teksermegen memlekettik qyzmetshilerdiń isi qaraldy
ShQO ádep jónindegi keńes otyrysynda energetıka mınıstrligi atomdyq jáne energetıkalyq qadaǵalaý men baqylaý komıtetiniń Shyǵys Qazaqstan oblysy boıynsha departamentiniń basshysy men qyzmetkerlerine qatysty tártiptik is qaraldy.
Bul memlekettik qyzmetshiler qaıta-qaıta aqaý shyǵyp, apat bolyp jatqan Rıdder jylý elektr ortalyǵyna júıeli baqylaý júrgizbegen.
«Ótken jyldyń mamyr aıynda atalǵan departament qyzmetkerleri «Rıdder JEO» AQ-ǵa qatysty tekserý júrgizip, energetıkalyq protseske áser etetin 70-ke jýyq zań buzýshylyqty anyqtaǵan. Ortalyq basshylyǵyna buzýshylyqtardy joıý týraly nusqama berildi. Biraq onyń oryndalý merzimi – 2022 jyldyń jeltoqsan aıy dep kórsetilgen. Ádep jónindegi keńes músheleri bul qate sheshim degen qorytyndy jasady. Óıtkeni jylý maýsymy bastalǵanǵa deıin JEO-daǵy barlyq olqylyq joıylýy kerek edi. Tekserý júrgizgen laýazymdy tulǵalar nusqamada dál osyndaı merzim belgilese, apattyń aldyn alýǵa bolar edi», - deıdi QR memlekettik qyzmet isteri agenttigi Shyǵys Qazaqstan oblysy boıynsha departamentiniń basshysy, ádep jónindegi keńes tóraǵasy Nurlan Erkebaev.
Onyń aıtýynsha, apat shyǵýynyń basty sebebi - jabdyqtardyń ábden tozýy.
Mınıstrlikke olardyń jaǵdaıyna qatysty teris baǵa berildi, sondyqtan jabdyq apatty jaǵdaıda qaldy.
Sonyń saldarynan oǵan eshqandaı qarajat salynbaı, kúrdeli jóndeý júrgizilmedi.
Rıdder jylý ortalyǵyn tekserýge barǵan memlekettik qyzmetshiler basqa da qate esepteýler jasaǵany anyqtaldy.
«Atalǵan laýazymdy tulǵalar memlekettik qyzmettiń bedelin túsiretin áreketterge barǵan. Keńes músheleriniń kópshiliginiń daýsymen olar qyzmetine tolyq saı emes dep tanylyp, eskertý jasaldy», - deıdi N.Erkebaev.
Eske salsaq, 19 qańtarda Rıdderdegi jylý elektr ortalyǵynan órt shyqqan bolatyn.
Birneshe saǵattyń ishinde qyzyl jalyn aýyzdyqtaldy.
Keıinnen jylý elektr ortalyǵynyń basshylyǵyna qatysty tergeý júrip jatqany habarlandy.
Danıal Ahmetov Rıdder jylý elektr ortalyǵyndaǵy aqaý men apattan úıleri qaıta-qaıta sýyp ketip otyrǵan turǵyndardan keshirim suraǵan edi.
Sonymen qatar jylý elektr ortalyǵynyń ıesi aýysqany belgili boldy.
