Rıdder jylý elektr ortalyǵynyń qaryzy 3,3 mlrd teńgege jetti
Shyǵys Qazaqstan oblysynyń ákimi Ermek Kósherbaev óńir boıynsha alǵashqy saparyn eń mańyzdy nysandardyń biri - «Rıdder JEO» AQ jumysymen tanysýdan bastady.
Onda jylý ortalyǵynyń basshylyǵymen jáne jóndeý jumysyna tartylǵan merdiger uıymdarmen keńes ótkizdi.
Ákimge JEO-ny rekonstrýktsııalaý maqsatynda atqarylyp jatqan jumystar jaıly baıandaldy.
Ortalyqtyń jańa bas dırektory Igor Mıhaılenko 5 jyl buryn osy JEO-ny basqarǵan jáne onyń erekshelikterin jaqsy biledi.
«2018 jyly 5 qazandyq, 4 týrbına jumys istedi, 1 qazandyq rezervte turdy jáne kompanııanyń shotynda 1 mlrd teńge boldy. Osyǵan deıingi menshik ıeleri jylý ortalyǵyna tıisti jóndeý jumystaryn júrgizbeı paıdalanyp kelgen. Qazir JEO qaryzy 3,3 mlrd teńgege jetti», - deıdi Igor Mıhaılenko.
Onyń aıtýynsha, jóndeý jumystary josparǵa sáıkes júrip jatyr.
Ermek Kósherbaev osy jumystardyń barysymen tanysyp, beıindi vedomstvolardyń basshylaryna tıisti tapsyrmalar berdi.
«Osy ýaqytqa deıin qalanyń ıgiligi úshin jumys istep kele jatqan qyzmetkerlerge jáne shydamdylyq tanytyp, jaǵdaıǵa túsinistikpen qaraǵan rıdderlikterge alǵys bildiremin! Jylytý maýsymynyń basyna deıin jóndeý jumystaryn aıaqtaý úshin bar kúshimizdi salamyz. Biz qalany jylýmen qamtamasyz etýimiz kerek», - dedi Shyǵys Qazaqstan oblysynyń ákimi.