Rıdder Jylý elektr ortalyǵyna 11 mln teńge aıyppul salyndy

RIDDER. QazAqparat - Prokýratýranyń qadaǵalaý aktisi boıynsha «Rıdder Jylý elektr ortalyǵy» AQ-ǵa 11 mln teńge aıyppul salyndy. Al Rıdder turǵyndaryna jylý tıisinshe jetkizilmegeni úshin 63 mln teńge óteldi. QazAqparat bul týraly Shyǵys Qazaqstan oblysynyń prokýratýrasyna silteme jasap habarlaıdy.

2022 jyldyń qarasha aıynda Rıdder qalasynda apat oryn alyp, turǵyndarǵa jylý berý temperatýrasy tómendegen bolatyn.

Atalǵan jaǵdaıdyń sebebin anyqtaý úshin Shyǵys Qazaqstan oblysynyń prokýratýrasy ýákiletti organdardyń mamandarymen birlesip, kásiporyn qyzmetinde tekserý júrgizgen.

«Onyń nátıjeleri «Rıdder JEO» AQ-nyń qanaǵattanarlyqsyz tehnıkalyq jaı-kúıin kórsetti.

Zańnamalardy buzýdyń 240-tan astam faktisi anyqtaldy.

Prokýratýranyń qadaǵalaý aktileri boıynsha ýákiletti organdar JEO-ǵa qatysty buzýshylyqtardy joıý týraly nusqama shyǵara otyryp, 11 mln teńgeden astam somaǵa ákimshilik jaza qoldandy.

Sondaı-aq prokýratýranyń usynysy boıynsha «Rıdder JEO» AQ jylý energııasyn tıisti deńgeıde jetkizbegeni jáne sapasynyń nasharlaǵany úshin tólemdi qaıta esepteý arqyly 63,3 mln teńge somasyna 21,7 myń tutynýshyǵa zalal óteldi», - delingen ShQO prokýratýrasynyń habarlamasynda.

Budan bólek, tekserý barysynda tabıǵı monopolııalar týraly zańnamany buzý faktisi anyqtaldy. Atap aıtqanda, 548 mln teńge somasyna tarıftik smeta men ınvestıtsııalyq baǵdarlamanyń qarajaty maqsatsyz jumsalǵan.

«Rıdder JEO» AQ úshin 2023 jylǵy 1 sáýirden bastap 2024 jylǵy 31 naýryzǵa deıin halyqqa tarıfti 18% tómendete otyryp, ýaqytsha ótemdik tarıfti bekitti.

Aıta keteıik, Rıdder JEO-da qarasha aıynda bolǵan apattan keıin munda tótenshe jaǵdaı oqıǵalary kúni búginge deıin qaıtalanyp keledi. Máselen, 5 qańtarda JEO-da bager stantsııasy qaıtadan sý astynda qaldy. 19 qańtarda atalǵan ortalyqta órt shyqty. 28 aqpanda №1 jáne №2 qazandyqtar jumysy toqtatyldy. 21 naýryzda JEO-nyń eki qazandyǵy órtke orandy.

23 naýryz kúni saǵat 7:50-de Rıdder JEO №6 qazandyq aımaǵyndaǵy jarylys boldy.