Rıdder jylý ortalyǵyndaǵy jarylysqa qatysty jalǵan aqparat taratqan bloger jaýapqa tartyldy

ÓSKEMEN. KAZINFORM – Shyǵys Qazaqstan oblysy Rıdder qalasyndaǵy jylý elektr ortalyǵynda bolǵan jarylysqa qatysty jalǵan aqparat taratqan blogerge aıyppul salyndy.

21 jeltoqsanda Rıdder jylý ortalyǵynda gaz-aýa qospasy jarylyp, 6 adam zardap shekken bolatyn. Sol kezde áleýmettik jelidegi toptardyń biri ortalyqta iri apat bolǵany jaıly jalǵan aqparat taratqan.

ShQO sotynyń málimetine súıensek, bul qoǵam arasynda dúrbeleń týdyrdy.

- Sot topty júrgizip otyrǵan blogerdi ákimshilik jaýapkershilikke tartý týraly qaýly shyǵardy. Oǵan QR ÁQBtK-niń 456-2-babynyń 3-bóligine sáıkes 20 AEK kóleminde aıyppul salyndy, - delingen aqparatta.

Aıta keteıik, zań boıynsha jalǵan aqparat taratqan jeke tulǵalarǵa – 20 AEK, shaǵyn bıznes jáne kommertsııalyq emes uıymdar úshin – 30 AEK, orta bıznes úshin – 50 AEK, iri kásiporyndar úshin – 100 AEK kóleminde aıyppul qarastyrylǵan.

Eske salsaq, osyǵan deıin Rıdderde órtengen úıden adamdy qutqaryp qalǵan 22 jastaǵy jigit marapattalǵany habarlanǵan.