Rıdder jylý ortalyǵynda otyn joqtyǵy qanshalyqty ras

Shyǵys Qazaqstan oblysy Rıdder qalasyndaǵy jylý elektr ortalyǵynda otyn joqtyǵy jaıly aqparat shyndyqqa janaspaıtyn bolyp shyqty, dep habarlaıdy QazAqparat tilshisi.

Sońǵy kúnderi BAQ-ta jáne áleýmettik jelide Rıdderdegi jylý ortalyǵynda otyn joqtyǵy jaıly aqparat tarap jatyr.

Ortalyq basshylyǵy buny joqqa shyǵardy. Qazir JEO jeke menshikten qala ákimdigine qarasty «Rıdder sý arnasy» KMM balansyna berilgen.

«Rıdder JEO-da otyn joqtyǵy týraly qaýeset tarady. Biraq bul shyndyqqa janaspaıdy. Búgin ortalyqta 20 kúnge jetetin kómir jáne mazýt qory bar», - deıdi «Rıdder sý arnasy» KMM basshysy Konstantın Han.

26 tamyzdaǵy jaǵdaı boıynsha JEO-da ortasha qysymdaǵy birinshi qazandyq iske qosylǵan. Qala ákimi Dáýlet Batyrbaevtyń aıtýynsha, №3-shi qazandyqqa da ot jaǵylǵan.

«Otynǵa mazýt qospasyn paıdalandyq. Budan keıin ystyq sýmen shaıamyz da, ony ary qaraı jelige jiberemiz. Býmen jylytqyshtar, qubyrlar jańa bolǵandyqtan, bul kóp ýaqyt almaıdy. Júıe qyzǵan soń qalaǵa ystyq sý beriledi. Aldymen áleýmettik nysandarǵa, ıaǵnı balabaqsha, mektep pen aýrýhanalarǵa», - deıdi ol.

Kún sýytqan saıyn rıdderlikterdiń úılerine jylý berile bastaıdy. Birinshi kezekte áleýmettik mańyzy bar nysandarǵa qosylady.