Rıdder jylý ortalyǵynda qazirgi ahýal qandaı

Shyǵys Qazaqstan oblysy Rıdder qalasyndaǵy jylý elektr ortalyǵynda eki qazandyq iske qosyldy, dep habarlaıdy Kazinform. 

Qala ákimi Dáýlet Batyrbaevtyń aıtýynsha, júrgizilgen profılaktıkalyq tekserýden keıin JEO-daǵy № 1 qazandyq agregaty qaıta iske qosyldy. Sondaı-aq qazirgi ýaqytta ortalyqta № 3 qazandyq jumys istep tur.

«Turǵyndarǵa birer kún buryn qalaǵa berilgen jylý temperatýrasynyń tómendeıtini eskertilgen. Oǵan sebep — mamandarǵa qazandyqty tekserý boıynsha tehnologııalyq protsedýralardy júrgizý qajet. Bul — iske qosý-baptaý jumystarynyń ajyramas bóligi. Qazir qazandyq jumys istep tur», — deıdi ol.

Sınoptıkterdiń boljamynsha, Rıdderde aptanyń sońyna deıin aýa temperatýrasy kúndiz +17-den +20-ǵa deıin, túnde +8 — +13 gradýs aralyǵynda bolady.

«Tolyǵymen qaıta jasalyp jatqan jylý ortalyǵy qalypty rejımde senimdi jumys isteýi úshin aldaǵy sýyqtarǵa júıeli túrde tehnologııalyq daıyndyqtan ótkizilýde. Qazir qalalyq jylý elektr ortalyǵynan jeli arqyly qalaǵa 49,5 gradýsta jylý berilip otyr. Bul — osy aýa raıyna saı normanyń shegindegi temperatýra», - deıdi Dáýlet Batyrbaev.

Onyń aıtýynsha, jyly kózindegi jóndeý jumystary tehnıkalyq reglamentterdi saqtaı otyryp, belgilengen kestege saı júrgizilip jatyr.

Eske salsaq, osyǵan deıin Rıdder JEO-sy kommýnaldyq menshikke beriletini habarlanǵan.